DE MAON VAN LA BALMA
Ton Custers

‘T is al donker, ‘t glaas half laeg
de letste windj dae zeuk zich ziene waeg
verlaote sjteul op ein laeg terras
ein zaag geluid vanoet de Mas
de sjlaop dae wint de daag zeuk rös
‘T is de nach dae weer de sjterre kös
de grote baer dae kiek voldaon
en zeuk tösse de berg ein halve maon

‘T is gedaon weer veur vandaag,
morge eine nuuje daag
mit luuj die se weer kenne leers
mit druime die se oetprobeers
kiek wie de waeg nao ‘t paradies,
morge weer te gaon
net wie ‘t water van de waterval
langzaam wegdruimt in de maon

Vertroewd geluid noe van de nach
nooit ech gaon sjlaope mer de ganse daag gewach
örges geslumerd zich versjaole veur de zón
tösse de berg toet det de nach opnuuj begón
En eederein dae noe nag wakker is
dae veult de vrieheid hiej zo wie ze is
wie dae man dae sjteit veur waat d’r sjteit
kiekend nao de daag dae ten inj noe geit